Bantin Ijau Lelayang

Baka Libau (Rentap), Bantin ke bensumbar Ijau Lelayang tu siku tuai ari Batang Ai ke kih sereta liat bendar ngelaban Rajah kelia.

            Sebedau Bantin tu bulih pemerani kelia, iya bisi mimpi asai ke nemuai ke Panggau Libau. Datai iya din, iya lalu ngerumban deka betemu enggau Keling tang enda mukai-mukai Bungai Nuing (Sempurai) lalu ngasuh iya duduk dulu ba ruai iya.

            Bungai Nuing nanyaka pejalai Bantin lalu iya madahka diri datai ke Panggau Libau laban deka minta pengaruh ti ngasuh iya tau serang. Bungai Nuing madahka diri nadai pengaruh tau serang laban iya empu pan semina manuk sabung Keling. Iya lalu nyumpah Bantin ngasuh Bantin tu bulih reta tengkira sereta madahka nadai utai ulih munuh Bantin. “Agi dua hari nuan bamuk enda ngetu ngelaban munsuh, nuan nadai apa nama. Umur nuan panjai lalu seumur idup nuan deka nyadi manuk sabung orang.”

Sumpah Bungai Nuing tu amat laban Bantin amat nyadi manuk sabung Ngumbang (Berauh Langit) seduai Imba (Buda) di Batang Ai sekumbang iya ke agi idup. Iya kala nyadi manuk sabung Ngumbang enggau Imba lebuh ngalahka bansa Memaluh di Bukol, pati Kapuas; ngelaban Tekalong ari ili Lebuyan di Nanga Kapar; ngalahka rumah Munau di Sukong, ari ili Engkilili; negah bala Rajah di Batu Betanggi, Batang Sumpa dalam ai Delok; nyaup Kana belanggar enggau bala Rajah ba Wung Adai di Kanowit sereta negah bala Rajah di Batu Lemak, Ulu Delok.  

            Udah Ngumbang Berauh Langit nunduk ngagai Rajah, bala pungka lelaki Iban nembiak iya ke agi deka bebunuh ngelaban Rajah milih Bantin nyadi tuai sida ti baru. Bala sida ke pegai Bantin tu tadi lalu pindah ke Ulu Delok dalam Batang Ai.

            Dalam taun 1890, Resident H.F.Deshon ngasuh Ngumbang nyerang Bantin. Ketegal nitihka jaku Deshon nya, bala Iban di Batang Ai ke begulai enggau Ngumbang ngelama tu enda tentu rinduka Ngumbang agi laban iya ulih sabung orang putih ngayau diri sebansa, munuh diri semenua. Kenu ku penemu sida, pengawa baka nya enda patut dikereja orang raja berani baka Ngumbang.

            Dalam taun 1897, Resident D.S.J. Bailey nguluka bala ngayau Bantin tang enda mujur. Enda bangat lama udah nya, Rajah Charles Brooke datai ke Simanggang. Iya ngasuh Ngumbang betemu enggau Bantin, minta Bantin bebaik enggau perintah tang Bantin enggai nerima penemu Rajah nya laban iya agi deka bebalaska pemati anak menyadi iya ti dibunuh nembiak Bailey ti bebalaka Iban ari Sukong dalam taun 1896.

            Meda Bantin keras mai bebunuh, Rajah Charles Brooke ngasuh Ngumbang enggau tuai-tuai Iban ti taluk ke Rajah ngayau Bantin. Ba kayau tu, anak Bantin ke benama Inggol parai dibunuh bala Rajah.

            Pengudah kayau tu, sekali agi Rajah Charles Brooke beseruan ba Iban di Lubok Antu mai Bantin bebaik tang Bantin mengkang mai bebunuh laban udah laun alai bebaik ku iya. Pemulai Rajah Charles Brooke ari Lubok Antu, Bantin matak bala ngayau Sukong kena bebalaska pemati anak menyadi iya.

            Meda pengawa Bantin nyau majak baka nya, Rajah Charles Brooke ngasuh Munan anak Minggat ngalahka Bantin. Bantin alah tang enda ulih bunuh bala Munan laban iya nyau ngerarika diri ke garis entara menua Sarawak-Kalimantan ke kena pegai perintah Belanda.

            Dalam taun 1901, Iban di Seremat munuh apai tuai orang siku nama Bujal. Bujal tu Iban ari Badau, Indonesia, kaban belayan Bantin. Bujal tu setengah buta. Nya alai iya tesat ke langkau umai orang di Seremat. Kumbai munsuh, nya alai Bujal dibunuh Iban di Seremat. Bantin pedis bendar ati meda Iban Seremat munuh Bujal taja pan sida ti munuh Bujal tu udah diukum jil sereta diasuh Rajah Charles Brooke mayar pati nyawa awakka penyarut tu enda ngerekai, enda panjai.

            Taja pan atur Rajah nya ngena endar, Bantin mengkang enda puas ati laban darah enda tau enda dibayar enggau darah ku iya. Dalam taun 1902, Bantin bisi dua kali ngayau Iban di Seremat ke udah munuh Bujal. Bantin lalu nunu rumah orang Seremat.

Kebuah sida ngalahka Seremat laban nitihka atur adat orang Emperan ti betuaika Pateh Jalin, Pateh Lanting enggau Pateh Baning ke madah munyi tu, “Adat kami Emperan, enti Iban bisi parai dibunuh orang, bangkai sundang bangkai lalu darah sundang darah.”

Tuai sida ngalahka Iban Seremat nya Pateh Jalin empu. Pateh Jalin tu bansa Iban tang bebini jadi enggau indu Memaluh ke benama Tumpok ti enggau iya beranakka Temenggung Langit. Nyadi entua iya Dana endang pangkat Semagat (raja tauka tuai) bansa Memaluh.

Bala Pateh Jalin tu tadi ditinggang sida Bantin, Alam, Imba, Baro enggau Kijam. Semina Ngumbang (Berauh Langit) aja enda enggau laban iya ingatka sumpah antu ti madahka iya enda tau mungkal orang enti rumah iya empai retung ditunu munsuh. “Lebu udu mih kami andal meda dek ke jadi enggau menyadi kami Rabai. Kati dek enda nemu sida Kana, sida Alam udah dipungkal Munan di Ipoh?. Lebu udu mih kami tu ngurung remaung nyarih nyawa, ngubau nabau beriul bisa enti dek enggai enggau kami,” ku Ugil. Angkat dih Belayong megai baja lalu deka malu pala Ngumbang tang iya enda nyadi datai jari laban nyau dirara bala mayuh.

Ari nya sida lalu ngupas menalan endur bebunuh di Menalan Ketupung, Ulu Delok. Benung sida ngupas menalan, angkat bisi dih orang datai nganjung keresik, tubai, kain indu, bungai jarau enggau papung wi ti dikirumka Maja seduai Julai ari Seremat. Ku pesan Maja seduai Julai ti ditusi pemai seruan nya tadi, “Enti Bantin enda nyadi ngayau, tu tubai asuh empa iya. Kain tu asuh pasukka iya. Nyadi keresik tu ngasuh iya mai bala besai enggai ke enda chukup dipedua kami.”

Iya ke bendar, utai tu ukai datai ari Maja seduai Julai di Seremat tang dikirumka indu siku ke benama Semambu laban Semambu tu agi ringat ngagai Maja seduai Julai ketegal dua iku nya becharaka temuda ngelaban petunggal iya ke benama Berandah apai Unggom ari Sebangki. Lebuh mansang bechara ke Kuching, Berandah parai karam dipangkaka gelumbang besai ba Sebandi.

Nyadi Ngumbang ke enggai enggau sida ngayau tadi lalu rari ngagai Genting Kayu Malam ke betampung enggau Tinting Pan, entara menua Sarawak enggau Kalimantan Barat, Indonesia. Ketegal nya, Imba (Buda) lalu dipaduka sida nyadi tuai kayau nganti Ngumbang (Berauh Langit).

            Laban pemerani Bantin nyau majak semajak, dalam bulan Enam taun 1902 Rajah Charles Brooke ngasuh anak iya Rajah Muda Vyner Brooke matak bala besai kira betubuh dua belas ribu iku nyerang Bantin. Ari bala ngemayuh tu, bisi lima ratus iku bansa Laut sereta lima puluh iku raban sedadu ari Sarawak Rangers ke chukup sikap enggau senyata. Iya ke bukai nya bansa Dayak magang.

            Bala pengayau betubuh bisi dua belas ribu iku tu tadi betatam di Nanga Delok laban deka ngaga kubau tiga buah. Sebuah di Nanga Mepi, sebuah di Menyang lalu sebuah di Nanga Delok sebedau sida ngalahka rumah Bantin di Ulu Delok.

            Angkat dih enda mukai-mukai dia dih bala Rajah tu tadi tak mati siku-siku baka ke disipat, baka ke kena sumpit. Udah siku, siku ga mati. Nadai bisi pengelama. Nyau betelengkai aja bangkai bala Rajah ke mati tu tadi.

            Meda utai nyelai baka nya, bala Rajah ke agi idup lalu ngerarika diri pulai kili laban nyau bisi berasai takut. Kenu ku jerita, benung bala Rajah betatam di Nanga Delok, dia sida bisi meda dua iti utai chelum sereta besai baka lumpung batang lepu-lepu anyut ari ulu. Datai ba endur bala Rajah ke betatam di Nanga Delok, utai nya lalu nengelamka diri. Dipelabaka sida utai nya ular nabau.

Nampung tusi sida ke tuai, ninga rita bala Rajah deka mai tubuh ngemayuh nya mansang ngayau iya, dia Bantin tusah bendar ati. Iya lalu bedara, chukup enggau piring enggau ading sereta besampi enggau sabak-sabak minta tulung Petara laban ngira diri enda tetanka bala indu nembiak enti betempuh enggau bala Rajah ti betubuh dua belas ribu iku.

Malam nya Bantin bisi mimpi betemu enggau lelaki siku besai sereta kering bendar gamal ke madahka nama diri Bungai Nuing. Bungai Nuing lalu bejaku enggau Bantin, “Nama utai diketusahka dek Bantin. Pagila mih kami dua aka Keling datai nyaup seduai dek Ngumbang ngelaban bala Rajah. Pemesa ni nya dilaban kami duai aka Keling enti bala Rajah ke semina ngemayuh nya. Tang ingat Bantin, bangkai sida ti parai disumpit kami dua aka Keling nya enda tau ditegu, enda tau diambi kita tang tejuka pia aja.”

Nyadi kenu ku Ngumbang (Berauh Langit), utai chelum ke nyadi ular nabau nya tadi endang Kumang seduai Lulung empu ari Panggau Libau. Nya mih kebuah penyakit nya enda ngerampit orang ke empu menua laban Kumang seduai Lulung endang sigi datai nulung Bantin.

            Kenu ku jerita, lebih sebagi ari bala Rajah tu mati lebuh kayau buntu tu kelia. Ari pemayuh tuai-tuai Iban ke mati maya tu menya, Orang Kaya Pemancha Nanang enggau Pengarah Ringkai sama bela mati.

            Ari dua belas ribu iku bala pengayau batak Tuan Muda Vyner Brooke nya tadi, semina bala Pengulu Dalam Munan ke betubuh kira seratus iku aja ulih ngenataika diri ba rumah Bantin di Ulu Delok tang Bantin enggau bala iya lama udah nadai dia agi.

            Kayau tu kelia dikumbai “Kayau Lus” tauka “Kayau Buntu.” Dalam jaku orang putih kayau tu kelia disebut “Cholera Expedition” laban sida ke mati tu tadi kena penyakit muang ai tauka “cholera.”  Kenu ku jerita, agi tiga bulan pengudah nya, ai Batang Ai enda ulih endur mandi laban bau but ketegal mensia ke parai maya tu chukup mayuh.

            Maya Kayau Buntu tu, Ngumbang Berauh Langit ngalih ngelaban Rajah. Reti nya iya nanahka Bantin laban mayuh kaban belayan iya nitihka Bantin. Iya enda kempang ati nejuka bala kaban belayan iya dipumpung bala Rajah pia aja.

            Enda lama udah Kayau Lus, bala Rajah ngayau baru. Bala ke diuluka Abang Abol betiki ari Nanga Pan ngagai wung ke endur sida Bantin ngeramka ipa ba tuchung Bukit Pan tang sida enda bamuk laban bala Rajah ke ngelaung mintas ari puting Tinting Pan nyau ngalahka rumah Asu di Ulu Pan.

            Udah penyarut nya Bantin lalu betampung berumah enggau Alam di Langgung Tengang. Lebuh berumah dia, bisi sekali sida dialahka bala Rajah tang sida nadai bebadi laban nyau ngerarika diri ke Ulu Malom, Ulu Segentu enggau Ulu Ubang ngalih ke Kalimantan Barat, Indonesia. Sebedau sida rari, rumah Bantin seduai Alam ditunu sida dulu awakka munsuh pulai lebu.

            Dua bulan udah nya, Bantin seduai Ngumbang ngayau Iban di Sebeliau, Lemanak ke alai bala iya bulih pala tujuh puluh dua igi. Meda pengawa seduai tu jai amat baka nya, Bailey matak bala dua kali ngayau Bantin ke Ulu Delok enggau Ngumbang ke Batang Wie tang seduai iya enda ulih tangkap perintah.

            Enda lama udah nya, Ngumbang (Berauh Langit) nyerang Skrang ngalahka rumah Empurong di Nanga Belaie. Rumah Empurong enda alah diserang Ngumbang laban mar dialahka sida. Lebuh Ngumbang ngalahka rumah Empurong, Asun (Bah Tunggal) ari Entabai enggau Megong (Ngauh) apai Bansa ari Ngemah sama bisi enggau mantu Ngumbang. Pateh Jalin ke sama bisi enggau mantu sida Ngumbang bakal (lan) ba pun pending kena timbak orang ke empu rumah.

            Dalam bulan Sepuluh taun 1902, Rajah ngasuh Pengulu Dalam Munan matak bala ari Batang Rajang lalu Insol anak Nanang matak bala ari Saribas begulai enggau Banta ari Skrang nyerang Kana di Engkari laban Kana ditemu Rajah mantu Bantin. Nyadi bala Munan enggau bala Insol enda datai seretai. Nya alai bala Insol ke datai dulu lalu ditegah bala Kana di Sungai Engkari. Bala Insol seduai Banta alah bendar laban bala Kana.

            Nyadi bala Munan ari Batang Rajang tu datai dudi laban iya mansang nengah Kanowit sereta melunggang ari Katibas ke ulu Engkari. Lebuh bala Kana tu benung berami begawai Enchabuh Arung ngintu pala ke ulih bunuh sida ari bala Insol seduai bala Banta, sida iya lalu ditegah bala Munan urung dinihari. Laban ke mayuh udah mabuk, bala Kana parai lima puluh tiga tang Kana enda ulih tangkap tauka bunuh sida laban sempat ngerarika diri. Empa pemisa pemenga munsuh (pengaruh ti ngasuh munsuh jugau baka batu belau etb.) enggi Kana, dia dih Kos (Batu Lichin), iya nya anak Cina ke diiru Munan ke nganti di baruh tangga tanju sida Kana semina rerangap aja lebuh meda Kana seduai apai iya Munau nurun nabanka adi indu Kana nengah tangga tanju. Iya nadai ati deka ngelaban sida tiga nya ketegal ti nyau jugau, tebelenga sereta teperenan laban pengaruh Kana.

            Sepengudah tu, pengawa Kana ke ngelaban Rajah majak balat sebalat. Dalam taun 1904 iya bisi belanggar enggau bala Rajah di Wong Adai, Kanowit. Bala Rajah maya tu betuaika Rajah Muda Vyner Brooke seduai H.S.B. Johnson begulai enggau Pengulu Dalam Munan seduai Koh anak Jubang sereta mai bala sedadu ari Sarawak Rangers. Maya ke belanggar tu, bala Kana parai lapan belas lalu Kana empu putus tunjuk tang iya agi ulih ngerarika diri ke Bukit Mikai Pambar di garis entara menua Sarawak-Kalimantan. Kayau tu menya dikumbai orang “Kayau Bong Kap”, ngambi nama perau pengayau ke dikena sida Kana ke dirampas bala Rajah maya ke belanggar tu.

            Lebuh belanggar di Wung Adai, Kana ngeluanka perau Bongkap. Nyadi perau Batu Cheling diluanka Apai Mayan ari Kanowit. Sebedau sida belanggar, siku tuai Iban ari Merurun di Julau ke benama Mantok madahka diri enda enggau enti sida belanggar ari ulu Nanga Merurun. Nya mih kebuah sida enda nyadi belanggar ari ulu Nanga Merurun tang lalu belanggar ba Wung Adai.

            Pansik kami duai pasal Mantok enggau Batu Cheling tu bisi bebalut mimit laban bisi pengingat madahka Batu Cheling tu endang jejuluk siku tuai Iban ke benama Mantok. Kenu ku pengingat kedua tu, perau Bongkap ke diluanka Kana nya mih perau Mantok ke bejuluk Batu Cheling. Kami duai arapka penulis jerita lama ke bukai ulih mansik penyibil pengingat sida ke tuai ba pekara tu enggau lenak agi, enggau silik agi dudi hari ila.

            Lebuh belanggar tu kelia, mayuh bendar tuai-tuai Iban ke sama mantu Kana baka bala manuk sabung Ngumbang ke diuluka Bantin, Alam, Belayong enggau Pilang sereta bala manuk sabung Imba ke diuluka Gong, Rengga, Bakat enggau Kanchau. Rengga anak Bantin ke bejuluk Ambun Belabuh Wung Padong, Asap Melap Nanga Sukong tu ku jerita tuai parai dirachun tuai Kayan ke benama Anyi Buah ke datai ari Mendalam, Ulu Kapuas ba rumah Lirong di Ma Suling. Ketegal nya, Anyi Buah kelia diukum perintah Belanda $60.00 dikena mayar pati nyawa Rengga.

Tuan Muda, Bertram Brooke kala ngenang Kana munyi tu, “Kana, apart from his past record as a bitter and remarkably courageous enemy of Government in the old days, is an irascible despot in the ulu. He enjoys the prestige throughout the country of a man who has survived seven simultaneous Snider bullet wounds, whilst leading a forlorn hope in a river action against Government, when his fleet had deserted him and fled. He will remain a legendary ulu Dayak hero after he is dead.”

Dalam jaku Iban, genteran jaku di atas nya lebih kurang munyi tu; [Kana, kelimpah ari kala nyadi munsuh ti chukup berani sereta suah ngenusah perintah dulu suba, iya mega siku Raja Berani ti bekuasa bendar di menua ulu. Iya beberita bendar laban ke enda parai bekau ke udah ditimbak tujuh kali, tang enda ulih empa peluru lebuh belaban enggau bala perintah di Wung Adai, ke alai bala iya rari ninggalka iya kediri-diri. Iya endang tetap tebilang nyadi Raja Berani di menua ulu datai ke jemah ila].      

Nyadi Pengulu Kana ke bejuluk Nitar Tanah Digah Pala Wung, Keting Lasah Ngikil Lubang Tumbung tu anak Pengulu Munau di Engkari. Iya berani, tau serang sereta nyadi Tuai Kayau di Batang Ai udah parai Ngumbang (Berauh Langit), Imba (Buda) enggau Bantin (Ijau Lelayang). Kana kala ngalahka Rumah Julai di Batang Lemanak, Rumah Agan di Entabai enggau Bukit Balong.

Nama Kana ari Nanga Jela, Engkari tu bisi kena rintaika Mr. Robert Pringle (Rajah and Rebels) dalam lis nama tuai Iban ke bepangkat “tau serang” di Sarawak dalam taun 1841 ngagai taun 1941 begulai enggau Orang Kaya Pemancha Dana “Bayang” enggau Linggir “Mali Lebu” ari Saribas; Minggat ari Krian enggau anak iya Pengulu Dalam Munan; Ngumbang “Berauh Langit” ari Batang Ai enggau Balang “Balai Nyabong” ari Katibas.    

Kana dipaduka perintah nyadi Pengulu Penulung. Pengulu Penulung tu reti iya nadai menua (area) dipegai tang nulung semua pengulu ke kena pegai menua Batang Ai. Ari semua pengulu di Batang Ai ke serambau enggau iya, nadai siku sida lebih jelai berita ari Kana. Ketegal ti ngambi bagi dalam penyarut Pengulu Manang Asun (Bah Tunggal), dalam taun 1933 Kana kena buai perintah ke Lundu datai ke iya parai tuai di Lundu enda lama udah abis Perang Dunya Kedua dalam taun 1945.

Kena 16.5.1907, Bantin mansang ke pasar Kapit laban datai bebaik enggau Pengulu Dalam Munan. Pengawa bebanchak babi entara Munan enggau Bantin tu dikemataka Rajah Charles Brooke empu enggau Resident Charles Hose. Udah tembu pengawa bebanchak babi, Bantin meri Rajah Charles Brooke siti tanda pengingat iya nya sebatang sangkuh pengayau ke beremuyam laban jejabung buk munsuh, ke tanda iya bebaik enggau perintah.

            Dalam taun 1909 Bantin pindah ke Lebuyan, kena pegai menua Indonesia ke diatu. Iya parai tuai di Lebuyan dalam taun 1932 sereta dilumbung peturun iya din. Baka Ngumbang (Berauh Langit), Bantin mega dipelabaka Iban mati nyadi ular nabau laban iya pan tulung orang Panggau.


WhatsApp chat