Balang Balai Nyabung & Temenggung Simpi

Anak Berauh Ngumbang enggau Beredai ke benama Meradana (Dana) tu bebini jadi enggau Ganggung anak umbung Ambau seduai Remias. Nampung Mr. Jagit Anak Igang, penulis Jerita Bedalie ba Majalah Pegari Vol. 9-17, tusut Ganggung tu baka tu.

Replika Balang ke bensumbar Balai Nyabung

Dulu kelia, bisi dih sepun kayu menalu, ke bebungkung ba batang iya. Pemuas ke dipuputka ribut, bungkung kayu tu tadi lalu ngadaka anak mensia. Laban anak mit tu ada ari bungkung kayu menalu, ari nya iya digagaka nama Guru Pintu Batu Lubang. Iya bebini jadi enggau Seriam Bunga Gelumbang Lelangan Apung Pasang, iya nya indu ti ditemu iya empu, pansut ari pupu gelumbang. Seduai iya beranakka Aki Tunggal Ngeli Sigi Seleka-Leka, Antu Rambuk Bulu Geliga Lubang Dada ti jadi enggau Kumang Lampang Temaga, Chungut Indai Melicha sereta beranakka Aji Seli Lang Gima seduai Aji Berani Niap Bulan, Raja Suka Menyawan. Aji Seli Lang Gima bebini jadi enggau Bechegi Mali Besangkut, Jelenggai Bungai Rumput sereta beranakka Segugum Tungku Besi, Segenggam Tapa Dada Jari. Iya bebini jadi enggau Benih Lela Tugal Temian, Bintang Kena Tumbuh Di Emperan sereta beranakka Simpulang Gana Serangkang Kirai, Raja Sua Sebasah Rangkai ti bebini jadi enggau Dayang Semelang Tanggi Buluh Sepengelayang Dandang Danggur Uma. Seduai iya beranakka Aji Berani Niap Bulan (Aji Biak) ti bebini jadi enggau Dayang Chelentang Jeragam, Endu Chelam Kerukam, anak Sengalang Burung sereta beranakka Bedalie.

Bedalie tu bebini jadi enggau Dayang Kacha. Seduai iya nadai anak tang tetemuka telu dalam ruas buluh aur ti udah nya netas nyadi anak mit. Laban anak mit nya tadi berasal ari telu ti ditemu dalam ruas buluh aur, ari nya iya lalu diberi nama Telu Aur.

Silik pasal jerita tu tau dibacha ba bup tu

Telu Aur tu bebini jadi enggau Dayang Idah sereta beranakka Radin Tanjung, Demung Nutup, Demung Papan, Demung Suran, Demung Bada enggau Dayang Maya. Ari anak iya Demung Suran, Telu Aur tu nurunka Iban ke dikumbai Iban Dau ke diau di menua Embawang, Klauh, Melugu, Gua, Nyelan, Engkeramut, Selepong enggau Po Ai ba sitak Sri Aman ke diatu datai ke sehari tu.

Radin Tanjung bebini jadi enggau Dayang Nor sereta beranakka Ambau, tuai ti dulu mungkal Pengkalan Tabau di Batang Ai. Ari nya, iya suah disebut orang ke tuai ngena nama Ambau ke dulu mungkal Pengkalan Tabau, peling lanting Tawang bedagang tauka Ambau Tabau Pengkalan Tawang.

Ambau tu bebini jadi enggau Remias ke digelar orang Remias Indu Badas Tampak Dagang. Ambau enggau Remias beranakka Liang, Bambang, Pantas, Rimbas, Usin, Enteba (anak iru) enggau Ganggung ke belaki jadi enggau Meradana. Anak Ambau ke tuai ti benama Liang tu mega nurunka Iban Dau ke udah dikenang kitai baka ke di atas nya tadi.

Meradana seduai Ganggung beranakka Chiri, Jampi enggau Jalui. Chiri jadi enggau Singgah beranakka Temuna, Kuda enggau Empaga. Temuna bebinika Lemba (Lemok) sereta beranakka Saya (Saya’) seduai Saka. Saya tu diasuh Bungai Nuing jadi enggau Chepin sereta beranakka Jawa, Machan enggau Bangi. Machan bebini jadi enggau Mena beranakka Tami (Temenggung Rentap), Temenggung Simpi Pala, Karinchom enggau Mampak.

Kebuah Tami tu digelar orang Temenggung Rentap laban raran para penyalai pala munsuh ke digaga iya ari kayu kemali di Pulau Gerenih, Indonesia runtuh tauka rentap ditepan pala munsuh sepemulai seduai iya Temenggung Simpi nyerang Batang Tawang di Indonesia ngalahka bala Abang Bujang seduai Pengiran Kesuma. Ba serang tu kelia, Tami empu parai laban besuruk rejang enggau Pengiran Kesuma. Seduai iya bela mati belah wi. Di rantu jalai pulai, Tami idup baru laban diidupka Indai Abang.

Temenggung Simpi bebini jadi enggau Jeburi beranakka Temenggung Demang (Buah Raya), Temenggung Engkabang (Guntor) enggau Bansok. Temenggung Demang ke tebilang agi disebut Temenggong Buah beranakka Ba (Temenggung Jemat) enggau Temenggung Runggah. Ba jadi enggau Bejau sereta beranakka Undi, Unai, Uni, Garong, Ja (Ja’), Ayum (Rimau Badang), Suai enggau Ena. Garong belaki diambi Jubang sereta beranakka Temenggung Koh ari Nanga Entawau, Balleh, Kapit. Temenggung Koh tu siku tuai ke pemadu beberita ari Batang Rajang kelia sepengudah Balang ke bensumbar Balai Nyabong.

Sekeda ari keresa lama Temenggung Simpi ke diibun bala ba Sumpak Sengkuang, Emperan, Indonesia

            Kenu ku jerita, Temenggung Simpi nya mih keterubah Iban dititah tauka dichiri orang Panggau Libau nyadi temenggung. Niang aya kami Lemambang Likong Anak Ingkah, ari Rumah Itu, Sungai Pulang, Balleh, Kapit ke suah nemuai ngagai kaban belayan kami di Indonesia udah meda ngena mata iya empu bedil, tawak enggau menira (tambai) ke dikena orang ari Panggau Libau nitah tauka nyiri Simpi Pala nyadi temenggung ke disimpan kaban belayan kami di sepiak nyin. Kenu ku Jagit Anak Igang, tambai pengayau ke dibai Temenggung Simpi pulai ngemedung ari Panggau Libau agi bisi diibun peturun iya ke ngibun bilik Temenggung Simpi di Dusun Sadap, Batang Kanyau, Kalimantan, Indonesia datai ke sehari tu.

Duku ilang ke dibai Balang pulai ngemedung ari Panggau, agi diibun siku ari peturun iya empu ba Katibas

Tuju aku nuliska jerita Balang tu ukai deka ngusai nyerungkaika utai ke lama tang ngambika bisi dipeda ditela, ke chuan ke peduman kitai ke rebak baru diatu laban bisi isi jerita tu tau pulai ke ajar ngagai kitai Iban. Nangkan ke nya, Balang ke bensumbar Balai Nyabong tu endang siku ari raja berani ke bisi udah nguan menua Sarawak tu dulu kelia lalu gambar tauka tugu (statue tauka portrait) iya endang meruan agi bisi dipeda kitai ba Tiang Pengingat Rajah Charles Brooke di Pengkalan Batu (Water Front), Kuching datai ke sehari tu.

Di Mijum Sarawak (Museum Tun Razak) ke dulu suba, kitai mega bisi meda gambar Balang (gambar lukis) sereta enggau jerita iya ditulis ngelansa. Diatu gambar nya nadai agi dipeda aku ba Mijum Sarawak lalu aku empu pan enda nemu kini ke tunga gambar nya diatu.

Udah macha jerita Balang tu, kita ke bisi kala rembus ke pasar Kapit tentu nemu nama kebuah siti jalai di pasar Kapit digagaka nama Jalan Panglima Balang, iya nya ba endur opis Kapit District Council ke diatu.

Siti agi kebuah ke balat endar ngasuh aku tekuing ati deka nulis jerita Balang tu laban ulah enggau utai ke dikereja Balang kelia jauh bendar nyelai ari enggi raja berani bukai ke sama bela jelai nama, pegari rita maya nya kelia laban Balang tu siku mensia setengah Petara. Iya tau engkeramat sereta bisi maya alai iya tau ajih.

Nama Balang dirintaika dalam lis tau serang di Sarawak dalam kandang taun 1841-1941 begulai enggau sida Orang Kaya Pemancha Dana (Bayang), Linggir (Mali Lebu), Minggat, Munan (Pengulu Dalam), Ngumbang (Berauh Langit) enggau Kana baka ke ditulis Mr. Robert Pringle mansa bup iya Rajahs and Rebels The Ibans of Sarawak under Brooke rule 1841-1941.”

Pun jerita Balang tu baka tu. Dulu kelia, di Emperan Kawat tauka Emperan Engkeraju di Batang Kanyau, Indonesia ke diatu, bisi anak umbung siku benama Pok. Apai Pok tu benama Temenggung Engkabang ke bensumbar Guntor, iya nya anak Temenggung Simpi Pala enggau Jeburi ke dikenang kitai tadi. Taja nama iya baka ke nyelai didinga, Pok tu nangka pemajik enggau pemandai indu di Batang Kanyau maya nya kelia.

Hari siti, dia lelaki siku ke benama Bulik bisi rembus ngagai menua orang di Emperan Kawat laban ke deka ngiga indu ke bini. Bulik tu datai ari Bila Sedi di Batang Kanyau. Bulik tu sigat, kering, tampak rita, pegari nama laban iya tu tau serang.

Seninjik bendar, Bulik lalu tetemuka Pok. Maya nya Pok baru ngangkatka diri dara, benung iya manah dikayam. Laban endang udah adat orang ke deka jadi melaki bini maya nya kelia, lelaki ke deka nanya indu ke bini enda tau enda diuji apai indai orang indu. Ari nya, Bulik pan kena uji Guntor. Guntor ngasuh Bulik nasau umai sida. Nyadi pemesai umai Guntor tu sekayu sungai siti, ulih pudik perau panjai tiga.

Hari siti Bulik pan berengkah ga nasau umai Guntor. Tembu nasau, Bulik pan lalu berengkah ga nebang. Pemesai beliung ke dikena Bulik nebang umbas san tubuh siku. Umbang tebang Bulik aja bulih mesai chapan anak mit, umbas digagaka dulang pemakai uduk. Laban ke berantu, ari nya Bulik nembuka umai Guntor tu semina dalam pengelama sehari setengah aja.

Nya alai, jadi mih Bulik enggau Pok. Kira sepiak taun Bulik enggau Pok udah begulai sejalai, dia bisi siti utai ke nyelai bendar nyadi. Lemai siti Bulik tinduk di ruai. Dia iya meda daun pintu sida tak semiak baka ke ditukangka orang. Keterubah iya, Bulik enda tentu irau ke utai nya laban iya nyangka pintu sida dipuputka ribut malam hari.

Dua tiga malam udah nya, agi ga utai ke baka tu nyadi. Bulik nyau mupuk irau ati laban nyangka bini iya Pok bisi buyu. Bulik tulihka runding deka nengkilunka orang nya laban deka nemu sapa bagi orang ti bisi datai kia. Nam malam Bulik udah nengkilunka orang nya, nadai mih iya meda orang tauka apa nama datai ngagai bilik sida.

Ba malam ketujuh, Bulik bisi mimpi asai ke betemu enggau lelaki siku. Bulik nadai kala meda lelaki ngering sereta ngenyigat nya ditambahka ngepan pekayan chukup magang. Iya lalu bejaku ngagai Bulik, “Ney Bulik, dini aku ulih tengkilun ke di, aku ga ukai mensia ti ulih peda ngena mata suman baka kita. Nyadi ke ngelama tu, aku mih ke ditengkilun ke di, ngayap bini di. Nya alai Bulik, diatu Pok nya bini tua. Tang taja pia Bulik, aku enda agi ngayap iya laban bini tua Pok nyau udah ribat. Nyadi anak tua nya ila lelaki Bulik lalu nama iya gaga ke nuan Balang ke bensumbar Balai Nyabong. Maya anak tua ada ila Bulik, nuan enda tau enda nyambut pengada iya ngena piring ngena ading; ngayang babi belang sereta munuh manuk labang ngambika iya enda alah serang laban Rajah. Balang tu mih ila Bulik deka nyadi raja ke bansa kita Iban nguan baruh hari tu. Enti sema bini tua Pok nyera deka makai utai, anang lembau nuan ngiga sera iya Bulik laban aku semampai nulung nuan. Baka nya mega Bulik, anak tua kedua ila indu lalu nama iya gaga ke nuan Charang. Charang tu mega agi darah getah aku. Charang tu mih nyadika pengibun enggau pengintu Balang. Seduai menyadi iya enda tau pambar ari pangan diri. Nyadi aku tu Ampa Jawa Setangga Tali, Bujang Sempiang Padi; aka tuai sida Keling ari Panggau Libau” ku lelaki nya madah ngagai Bulik. Bulik pan lalu tedani. Nya baru iya nemu diri bemimpi.

Pagi nya Bulik nusi penyelai mimpi iya ngagai Pok. Pok pan baka nya ga, nusi diri bisi mimpi tujuh malam berunggu digayap Sempiang Padi ari Panggau Libau tang temati runding enda ulih madahka Bulik.

Kenu ku jerita tuai, Sempiang Padi tauka Kemping Padi tu menyadi tuai sida Keling ke parai lulus. Iya bebini jadi enggau Endu Dara Duih Pemantis Ai Limban, Endu Kumang Lenggang Sebayan. Endu Dara Duih tu mega dikumbai orang Kumang Renging Bungai Angi tauka Kumang Lemping Sebayan. Iya tu menyadi tuai sida Kumang ari Gelung ke parai lulus.

Kira tujuh bulan udah betubuh bisi, dia Pok berasai tetenguk deka makai tebu telu. Laban di menua sida di Emperan Kawat dia nadai tebu telu, ari nya Bulik lalu bejalai nuju Bukit Tawang. Di Bukit Tawang din mih alai Bulik bulih sera bini iya.

Chukup bulan alai beranak, anak Pok pan lalu ada. Kenu ku jerita, anak mit ti ada tu mai rajut sekumbang punggung, ngepit nyabur muak ari kanan lalu ngepit terabai muak ari kiba. Semua utai tu tadi mit memagang tang mansang besai nyerumba pemansang Balang empu. Amat bendar ga mimpi Bulik, anak ke diadaka Pok nya amat lelaki.

Bulik lalu nirika Gawai Kenyalang Anak dikena nyambut pengada anak iya. Anak mit nya tadi lalu diberi nama Balang ke bensumbar Balai Nyabong nitihka mimpi Bulik empu.

Udah Balang tu nyau bujang bendar, sida iya lalu pindah ari Emperan Kawat laban deka ngiga menua baru. Sida ke pindah tu tadi nengah Penyangkai Piang. Nyadi Penyangkai Piang tu entara menua ulu Katibas, Sarawak enggau Kalimantan ke diatu.

Bala Balang ke pindah tu tadi lalu berumah ba Bukit Tunggal dalam sungai Bangkit. Sungai Bangkit tu benanga ba Batang Katibas, muak ari kiba enti kitai mudik ngulu Katibas. Sekumbang ke diau ba Bukit Tunggal dalam sungai Bangkit, Balang bisi nurun ngemedung ke Panggau Libau ari Bukit Panggau Dulang di entigis ulu Bangkit. Reti leka jaku ngemedung tu iya nya nemuai batang tubuh, nyengenda nyerupa ke menua-menua bukai ke ukai diwan kitai mensia baka ke Panggau Libau, ke Gelung, ke menua Sebayan, ke dalam ai, ke langit enggau menua-menua bukai ke enda ulih peda, enda ulih lawa kitai mensia diri tu. Pemulai ke ngemedung nya, Balang mai mayuh bendar macham pengaruh dikena ngayau baka batu pengansah ke bensumbar Batu Mali Lebu, Lelanjang Bungai Nuing enggau sekeda pengaruh ke bukai.

Sekeda ari tuai-tuai kitai Iban ke bukai ke kala dipansa jerita lama ke sama tau menselit nengah pintu langit singkum rapit nadai meranggang, tau nelian lubang ujan teman geran laja puang, tau nyidi lubang ai ke bereni jampat mansang, tau nyegi matahari baka bunga besi ditenchang, tau nyelikap nengah pintu kilat baka kempat kanggan dagang baka Balang iya nya nyengkaum aki kitai Sera Gunting enggau Temenggung Simpi Pala.

Ari Bukit Tunggal dalam sungai Bangkit, bala Balang surut kili agi sereta berumah baru ba emperan besai seberai Nanga Ririk, di tebing Batang Katibas.

Nyadi maya tu menya, Batang Katibas endang diwan bansa Kayan. Tang laban Balang tu endang pugu Raja Berani, ari nya bala Kayan nadai tan dilaban bala Balang. Tu mih ngujungka bala Kayan enggai agi nguan menua Batang Katibas laban takut diserang Balang.

Sekumbang ke diau di Nanga Ririk, Balang bisi nurun ngemedung baru. Ke sekali tu, iya ngemedung tujuh hari tujuh malam. Sebedau nurun ngemedung, iya bisi ninggalka pesan ngagai bala menyadi, petunggal, kaban belayan enggau sida serumah sereta sida semenua, minta sida nyambut pemulai iya ari Panggau Libau ngena piring ngena ading. Barang sapa sida ke bidik lansik, ba mua iya mih alai Balang mansutka diri.

Chukup timpuh tujuh hari tujuh malam, sida ke tinggal di menua sama sampal magang nurun ke dalam kampung laban deka nyambut pemulai Balang ari Panggau Libau. Balang ke pulai ngemedung tu tadi lalu pansut ba mua Ayum di Linsing Kuning, di ulu sungai Bangkit laban Ayum tu tadi bisi mai babi belang enggau manuk labang. Ari nya, Balang lalu nyumpah Ayum ngasuh Ayum tau serang numbangka menua, tau kayau mulau bala.

Beduduk ari sumpah Balang nya tadi, nadai tan menua munsuh dikayau Ayum ke bensumbar Rimau Badang. Balang ke pulai ngemedung nya tadi bisi mai duku ilang sebilah, geguluk sebilah enggau tawak penutung iya nya tawak dikena ngangauka sida ari Panggau Libau selebuan.

Sekumbang ke diau di emperan besai seberai Nanga Ririk, Balang bisi ninggalka kelai mayuh bendar. Siti ari kelai ke ditinggalka Balang iya nya iya bisi nanam embawang sepun ba teluk Kerangan Pulai Hari ke diatu. Nyadi penyelai embawang tu menya iya nya enti sema buah iya labuh ninggang ai Katibas, buah iya melepu tang enti sema buah iya ninggang tanah lalu udah nya bebelat ke ai Katibas, buah iya deka tengelam. Kebuah alai embawang tu baka tu laban iya udah diajihka Balang baka nya maya iya nanam embawang nya suba enda nyalah-nyalah embawang tanam Keling di Tembawai Bejuah ketungkah kitai Iban beserara enggau orang Panggau ke udah dikenang ba pun jerita tu. Buah embawang tanam Balang tu tau diempa tang diatu embawang tu udah nadai agi laban udah mati tuai.

Kelimpah ari nya, Balang mega bisi nanam tubu sepun ba tembawai sida iya empu di Nanga Ririk. Nyadi penyelai tubu tu iya nya iya deka bedarah dipantap enti bisi orang mati di menua nya. Kenu ku Mr. Stanley Ngelambong, tubu tu mali diempa sereta agi idup datai ke sehari tu.

Nyau pengelama ke diau di Nanga Ririk, nyadi sekali rumah sida Balang kena serang bala Kayan ke betuaika Taman Tanduk. Kenu ku jerita, Taman Tanduk tu bisi tanduk ba kening, sepemaut pemanjai iya. Maya bala Taman Tanduk tu ngalahka rumah Balang, Balang enggau pungka lelaki sida serumah nadai di rumah laban sampal ngabang gawai ngagai Rumah Ubong (Unchat) di Melipis dalam Batang Kanowit, kena pegai Batang Rajang.

Seninjik bendar, lebuh rumah sida baru betengan ditunu bala Taman Tanduk alai Charang pan datai di rumah laban iya pulai dulu ari sida bukai. Peda iya asap ngenjing chelum, alah asap orang ke nunu umai rimba.

Charang lalu ngerumban tama ke bilik sida iya empu ngambi rajut, pengaruh enggau reta tengkira ke dibai Balang ari Panggau Libau. Bala Kayan nadai siku tepedaka Charang laban sida kiruh ngeringak diri berangkutka perapasan.

Udah nya Charang lalu ngerumban madahka sida Balang ti benung ngabang di Melipis. Laban Charang tu mega anak Kemping Padi ari Panggau Libau, nya alai nadai pengelama iya ngenataika diri di Melipis ari Katibas. Iya lalu megau orang mayuh, madahka rumah sida udah retung ditunu munsuh. Orang pan lalu begau. Sida Balang pan lalu beguai mulaika diri.

Datai bala Balang di Nanga Ririk, bala Kayan udah ngerarika diri. Rumah sida Balang pan retung diempa api, semina tiang aja agi bekechuit tinggal.

Niang Benedict Sandin ba bup iya Sea Dayak of Borneo Before White Rajah Rule” madahka rumah sida Balang ukai diserang Kayan tang diserang bansa Tanjong tauka bansa Kanowit. Jerita tuai Iban di Batang Rajang empu sigi madahka rumah sida Balang diserang bansa Kayan laban bansa Kayan ringat diserang bala Rajah ari Kuching dalam taun 1861. Uji peda bup The Iban and Their Religion” ti ditulis Mr. Erik Jensen ba lambar ti ke-20.

Pedis ati nyepi rumah diri ditunu munsuh, dia Balang mai bala iya bebalas. Balang enggau bala iya ke bebalas tu tadi ngili Batang Katibas, ngulu Batang Rajang sereta tama ke Batang Balleh nyentuk ke Nanga Merama, iya nya seberai SRK Nanga Sempili tauka ari ulu Nanga Pulang ke diatu. Semua menua enggau rumah munsuh ke bisi kena pansa bala Balang ke bebalas tu tadi nadai enda anchur magang diserang bala Balang.

Maya aku rembus ke Rumah Engkechong Anak Maju, ulu Menuan, Batang Rajang, Kapit dalam bulan Lima taun 1989 suba, Ex-Tuai Rumah Maju Anak Inyang bisi nusika aku tibak jerita Balang ke besatup enggau Taman Tanduk empu ba pulau batu banchak Nanga Pila, ari ulu Wung Pelagus dalam Batang Rajang (Balui). Bala Kayan baka ke beribun nubai berebut deka munuh Balang ke mansang siku aja ngagai tekang bala Kayan ke nganti iya. Sida tumbang memagang dipepat Balang. Meda baka nya, Taman Tanduk lalu merejuk ngasuh nembiak iya nyeliah laban Balang nya ukai mensia ulih laban orang sengapa. Iya lalu nanam diri minta tumbuk Balang tang Balang enggai numbuk iya dulu laban ingatka pesan Kumang ti enda ngasuh iya dulu numbuk Taman Tanduk enggaika tulah. Peda Balang Taman Tanduk tu besai, kering, tinggi sereta bisi tanduk dua iti ba kening.

Meda Balang enggai numbuk iya, Taman Tanduk lalu matak sangkuh iya ke bulih mesai daun pingan muda. Sangkuh nya lalu diasurka iya ngagai dada Balang. Ditatka Balang aja rejang sangkuh Taman Tanduk laban nitihka pesan Kumang ti deka nguji meda penuai bulu iya. Ngembul mimit aja bungai tusu Balang alai enteran sangkuh Taman Tanduk pan lalu patah. Balang enda kekebut, nanam diri baka tunggul. Udah nya Balang lalu nyapai sangkuh iya empu sereta ngerejang Taman Tanduk. Sangkuh Balang kena dada Taman Tanduk sereta rembus ke belakang.

Laban pulau batu ke alai Taman Tanduk enggau Balang ke belaban tu enda besai iga, ari nya Taman Tanduk lalu labuh ke ai. Sereta iya rebah, iya lalu ditangkap Balang di kaki enggaika tengelam. Pala iya lalu dipumpung Balang ngena nyabur.

Dalam leka entelah sida ke tuai di Batang Rajang, pala Taman Tanduk tu kelia dilalaika orang munyi tu.

Sempurai Gundai belabung tambai, betangka tangkai betampung tali. Kumbu Rayung Raja Sekundung betampung enggau tangkung kenyalang danji.

Kenu ku Ex-Tuai Rumah Maju, nyabur Balang tu digaga orang Panggau Libau ari besi kuning ti dikumbai orang besi Bungai Nuing. Nya kebuah semua utai ti dipantap ngena nyabur nya nadai enda putus magang laban nyabur tu nadai ngira kebal. Ex-Tuai Rumah Maju mega nusika aku penyelai terabai enchepung enggi niang Balang tu menya. Enti disebut leka jaku ngayau tauka nyerang, pemanjai terabai enchepung Balang tu kelia tau nyulut sejengkal, pemesai iya nambah setempap lalu penebal iya mansang setunjuk.

Bala munsuh balat bendar tebunsa diserang bala Balang. Tu mih ngujungka bansa Kayan enggai agi nguan menua ili laban sida iya takut diserang Balang.

Udah Libau Rentap alah di Bukit Sadok kena 28.10.1861, Rajah Charles Brooke bisi mudik ngulu Batang Ai melunggang sereta ngili Batang Katibas. Iban di Katibas maya nya serebana ngagai iya madahka sida suah diserang bansa Kayan ari ulu Batang Rajang. Ari umbuk Balang (Balai Nyabong) sereta ditambahka sida Kayan tu udah ngelindung Sawing, Sakalai enggau Talip ti munuh Charles Fox enggau Henry Steele di Kanowit kena 25.6.1859 (Buyong Bin Adil – Sejarah Sarawak); Rajah Muda Charles Brooke besetuju ngelancharka kayau besai kena 15.5.1863 begulai enggau bala pengayau Iban ti betubuh bisi lima belas ribu iku, mai lima ratus buah perau pengayau ti diuluka Balang (Balai Nyabong) ari Katibas enggau Orang Kaya Gasing ari Skrang.

Kayau tu kelia dikumbai Kayau Kayan tauka The Great Kayan Expedition dalam jaku bansa ribai. Jerita ke silik agi pasal pengawa ke dipangku enggau dikereja Balang maya Kayau Kayan nya menya tau dibacha ari bup Ten Years in Sarawak (1866) ti ditulis Rajah Charles Brooke empu.

Ba bup tu, Rajah Charles Brooke bisi nulis munyi tu:

The first man to speak after I had finished was Balang of Katibas; an ugly, little broad man with the jowl of hog. He spoke exceedingly well and I wished from my heart my speech could have been so telling.”

Kenu ku sida ke tuai, Balang kelia sigat, kering, jaku iya berenaing lalu mata iya chalung sigi ngipakka mata Raja Berani tang Rajah Charles Brooke ngumbai iya ugly, reti nya jai gamal. Pelaba aku, penyigat ba mata kitai Iban nyangka enda sebaka enggau penyigat ba mata orang putih laban tugu tauka gambar (potrait) Balang empu agi bisi nyadi ke tanda ke tau dipeda kitai datai ke sehari tu.

Ba bup Ten Years in Sarawak, jaku ti dipansutka Balang ditulis Rajah Charles Brooke munyi tu:

“I have no wish to return if the force is not successful, and am prepared to stake everything on this attack. The enemy has deprived me of all my property already, and many of my relations and people have been killed; they may now cook my head, if I can’t get theirs.” He added, “The chiefs, as the Tuan says, should be responsible for their people; and I recommend others to follow my example, and beat their followers if they refuse to obey orders.” (M.G. Dickson – A Sarawak Anthology, rambal ke-202).

            Ba Kayau Kayan tu kelia, mayuh bendar Raja Berani enggau Bujang Berani kitai Iban sama enggau ngayau baka sida Nanang anak Orang Kaya Pemancha Dana (Bayang), Linggir (Mali Lebu), Pelima Bakir, Minggat (apai Runai), Chulo (Tarang), Pelima Mujah (Buah Raya), Ubong @ Unchat, Lintung (Muahari), Balang (Balai Nyabong), menyadi iya Ranggau, Unggat, Gerinang (Nitik) enggau Orang Kaya Gasing.

            Raban ari Katibas ti betuaika Balang (Balai Nyabong), Ranggau, Unggat enggau Gerinang (Nitik) bulih pemadu mayuh pala, tangkap enggau perapasan datai ke enda ulih buat perau pengayau sida. Ari nya, sekeda ari pala, tangkap enggau perapasan ke ulih sida disakaika sida ba perau Mujah (Buah Raya).

            Raban ari Kanowit ti betuaika Mujah (Buah Raya), Lintung (Muahari) enggau Ubong mega bulih mayuh bendar pala, tangkap enggau perapasan nangkanka raban ari Katibas.

            Raban ari Skrang, Saribas enggau Kalaka ti betuaika Orang Kaya Gasing, Linggir (Mali Lebu), Nanang, Bakir, Minggat (apai Runai) enggau Chulo (Tarang) enda tentu bulih pala, tangkap enggau perapasan laban bedalihka diri enda tentu nemu pendiau munsuh, enda teleba rampa menua enggau gaya ai di ulu Batang Rajang.

Bansa Orang Ulu tebunsa bendar maya Kayau Kayan tu kelia kelebih agi nya bansa Rajang (Tanjong), Kejaman, Sekapan, Lahanan, Punan, Kayan enggau Kenyah ti ngujungka sida iya mayuh rari ke ulu Anap, Tatau.

Sebedau pulai ngayau ari ulu Batang Rajang, Rajah Charles Brooke meri menira Sarawak enggau leka meriam sigi ngagai siku indu Kayan ti ulih tangkap sida. Pemai seruan nya diasuh Rajah Charles Brooke nyua ke tambai enggau leka meriam nya ngagai tuai Kayan ti benama Oyong Hang. Enti Oyong Hang milih menira Sarawak, reti nya iya ngampun sereta mai bebaik lalu enti Oyong Hang milih leka meriam, reti nya iya mai beperang.

Nyadi Iban ke bempu tangkap nya tadi berat bendar ati ngelepaska indu Kayan ti ditangkap iya nya laban kenu ku iya, sida Kayan udah munuh indai enggau menyadi indu iya. Nya alai, iya begunaka indu nya dikena nganti pemarai indai enggau menyadi indu iya. Taja pia, Rajah Charles Brooke tetap ngelepaska indu Kayan nya laban diasuh iya mai seruan ngagai Oyong Hang.

Kira sebulan udah nya, Oyong Hang nurun ke Nanga Skrang mai tambai sereta enggau pala Talip seduai Sakalai ti udah dipumpung Oyong Hang empu. Sawing enda ulih bunuh iya laban sempat ngerarika diri. Udah nya pengawa bebaik entara bansa Iban enggau bansa Kayan diatur perintah di Kanowit, iya nya dalam bulan Sepuluh taun 1863.

Bala nembiak Balang ke agi ringatka rumah panjai sida udah ditunu munsuh balat bendar menyati sereta merinsa ulun maya tu menya. Ketegal nya, dalam taun 1863 nya mega, Balang kena tunggu Rajah Charles Brooke dua belas igi tajau rusa (Derek Freeman – “Some Reflection On The Nature Of Iban Society” – lambar ke-62).

Udah bekau rumah iya di Nanga Ririk retung ditunu munsuh, Balang matak bala iya pindah baru ke Nanga Ngemah di Batang Rajang. Sekumbang ke berumah di Nanga Ngemah, sekali agi Balang bisi nurun ngemedung ke Panggau Libau ari Bukit Melapi di Tinting Simanggang. Pengawa Balang ke suah ngemedung ke Panggau Libau tu bisi dilalaika sida ke tuai dalam leka main Iban ke dikumbai entelah ke munyi tu:

Beketan Apai Makap belangguka kabu iku sirat, bejalai beguai-guai nengah tatai tanah lengkap. ”Oh lalu, ngetu dulu mih Beketan Apai Makap.”

Eh, enda aku ngetu laban beguai ngerumban Unchat begawai kenyalang.”

Beketan Apai Makung belangguka kabu gempung jejabung, bejalai beguai-guai nengah tatai tanah langgung.

Oh lalu, ngetu dulu mih Beketan Apai Makung.”

Eh, enda aku ngetu laban beguai ngerumban Lepung Nyaru Adung endur tiung betimbung mandi melenang.”

Pemulai ke ngemedung ke sekali tu, Balang nirika Gawai Burung ke pemadu besai ti dikumbai Gawai Gerasi Papa. Enggau tu Balang mih Iban ketiga sereta ke penudi udah nirika Gawai Gerasi Papa kelimpah ari Sera Gunting enggau Radin ke udah dikenang kitai dulu ari tu. Maya Gawai Gerasi Papa tu baru udah tembu, dia Balang bisi meda rajut dikaitka ba singka kawing (tanduk rusa) di ruai sida iya empu. Balang lalu ngerah orang mayuh, minta sida ke nembiak anang ragak chapuh rirah, minta sida ke tuai nginsit begadai surut nyeliah, minta sida ke bebuti belubah agi ngetu besengah. Udah bala nembiak badu ragak richah betegagap, udah sida ke tuai nginsit begadai nyeliah ngansat, udah sida ke bebuti belubah agi ngetu bekendap, Balang lalu nesau bala pengabang ke agi bisi tinggal, nanya ke sapa bempu pengaruh nya. Siku pan nadai mih pengabang bisi ngaku diri bempu pengaruh tauka rajut nya.

Lelak begigaka orang bempu pengaruh nya, enda berasai Balang lalu ngantuk sereta asai ke bemimpi betemu enggau lelaki siku. Orang nya lalu bejaku, “Puas endar nuan Balang dipeda aku begigaka orang bempu pengaruh nya. Nyadi nya pengaruh aku tang ditinggalka aku laban diberi ke nuan. Enti nuan ngayau ke menua tasik ngena pengaruh nya Balang, nuan enggai betemu enggau munsuh tang mih nuan nadai apa nama. Lalu enti nuan ngayau adap ke matahari tumbuh ngena pengaruh nya, sigi nadai enchepaika jari munsuh dilaban nuan Balang. Nyadi aku tu Ribai, raja orang di menua tasik,” ku lelaki nya madah ngagai Balang.

Sekumbang ke diau di Nanga Ngemah, Balang bisi ngereja siti pengawa ke nyelai bendar ti dipelabaka tau ngalitka ati kitai mayuh.

Nyadi sekali, orang ba rumah panjai seberai Nanga Ngemah ke diatu bisi begawai. Balang tu tadi diasuh indai iya Pok minta buah pinang ngagai orang ti begawai nya. Iya pan lalu nurun mai sengayuh siti nuju pengkalan pendai sida iya. Datai din, peda iya nadai sebuah perau agi tinggal laban ambis dikena sida serumah ngabang ke seberai.

Tang seninjik bendar, maya nya menyadi iya Charang benung masu tikai. Balang lalu nyingkau siti ari tikai pandan ke dibasu Charang. Meda ulah Balang ngenyelai nya, Charang lalu nanya.

Kapa nuan tikai pandan nya dih aka?” ku iya.

Eh, dikena aku ngelayang ke seberai, diasuh indai minta buah pinang ngagai sida ti begawai nyin,” ku Balang nyaut menyadi iya.

Udah nya Balang lalu nepan ba tikai pandan nya tadi sereta bekayuh ngelayang ai Batang Rajang ke seberai. Nyadi maya nya bala pengabang benung beratur niki ba pengkalan pendai sida ti begawai. Sama bela tebelenga bala pengabang baka ke ngemataka perua pasang menuh, sama temati kutu bala pengabang baka jelu kena lunju mata sangkuh, sama ngenung bala pengabang baka burung tiung ngemataka tugung kayu labuh meda Balang tu merau ngena tikai pandan. Berengkah ari sehari nya, Balang lalu ditemu orang tau merau ngena tikai pandan sereta agi nyadi ke buah mulut sida ke tuai di menua Batang Rajang datai ke sehari tu.

Balang tu tadi nyau majak tampak rita, pegari nama. Ari nya, dia dih mayuh tuai-tuai ari pupu raban bansa maya tu kelia pedis ati tauka chemuru ngagai Balang (Leonard Edwards – Short Histories of The Lawas and Kanowit Districts, rambal 120-121).

Nyadi sekali, bini Unggat ke benama Sedungan bisi mimpi. Iya bemimpi diasuh antu butang enggau Balang. Enti iya udah butang enggau Balang, nya baru laki iya Unggat deka jelai nama, tampak rita baka Balang.

Berindik ari penyelai mimpi Sedungan tu tadi, Unggat pedis endar ati ngagai Balang. Sapa kitai lelaki tu enda pedis ati enti bengat dikeduan antu baka nya? Kenu ku jerita tuai, mimpi tu sengaja digaga ditempa Sedungan empu laban iya nadai agi chara bukai dikena ngulihka Balang. Pemacha mayuh, enda manah kita indu ngiga dalih ke baka tu taja dalam ati din tetenguk endar ke utai mali laban ulah ke baka tu ukai semina ngerusak kita empu tang mega ngerusak orang bukai.

Nyadi Unggat tu mega siku ari bujang berani di Batang Katibas maya nya kelia, menyadi Gerinang ke bensumbar Nitik. Nampung Lemambang Alin Anak Lemambang Salih, dulu kelia bisi orang dua iku diri menyadi benama Singka enggau Saka. Singka bebini jadi enggau Reba. Reba tu buta tang iya bisi ulun siku benama Unyang nyadi ke mata iya laban Reba tu peturun anak raja. Singka enggau Reba bisi anak tiga iku ke benama Rimau, Naga enggau Sumping.

Naga beranakka Gerinang (Nitik) seduai Unggat tang Unggat diiru Sumping laban Sumping nadai anak. Rimau, Naga enggau Sumping tu endang peturun raja berani ke teleba muai unak muai lemetak, ngupas agang ngerumpang batang ku jaku tuai. Apai sida iya ke benama Singka nya mih keterubah Iban nemu ngaga peredah beliung ari ajar Bungai Nuing.

Rimau bebini ngambi Payah beranakka Lasa, Sigau enggau Abang. Lasa bebini ngambi Inta beranakka Langkat, Inching, Belantau, Nabau enggau Kumbong ke bensumbar Keting Nguyu. Kumbong tu tebilang agi disebut orang Apai Bakum. Kumbong bebini jadi enggau Sindu. Sindu tu anak Ngelambong enggau Lanyun. Ngelambong tu anak Balang ke bensumbar Balai Nyabong enggau Rawa (Kumbau) ke dikenang kitai dalam jerita tu. Apai Lemambang Alin ke benama Salih tu anak Belantau seduai Nyawai. Belantau tu mega siku ari uchu Rimau, aka tuai Naga seduai Sumping.

Nyadi dalam taun 1866, Balang deka nirika Gawai Besai; ngayang babi belang tujuh iku sereta munuh manuk labang tujuh iku dikena makai selamat madahka sida ari Panggau Libau ngabang.

Ngena peluang Balang ke deka begawai nya tadi, Unggat ngaga petenah ngagai Rajah Muda Charles Brooke madahka Balang tu deka munuh Charles Brooke nyadika babi belang lalu Resident di Sibu (Rejang), iya nya J. B. Cruickshank nyadika manuk labang. Ari petenah tu, dia deh orang putih kelia ngumbai babi belang tu bansa orang putih (an European). Uji peda ”An Iban-English Dictionary” ke ditulis Mr. Anthony Richards (1988) ba genteran tauka entelian babi belang, rambal ke-21.

Leka timang Iban di Kapit bisi nyebut munyi tu:

Nya baru engkelili rumbau nyadi, tubuh nyaduh dia orang belabuh mudi. Tu mantaika budi Iguh munuh Memaluh, empai mantap dudi munuh, dulu sapi enggau telu raung bungang. Mantaika budi Unggat, empai munuh dudi mantap, dulu sua ke kerat babi belang.”

Ketegal kerat babi belang nya mih Charles Brooke pechayaka jaku budi Unggat, Balang tu sigi amat deka munuh orang putih.

Ninga ripot Unggat munyi nya, Charles Brooke pedis amat ati. Dalam leka sanggai ngading Balang, orang bisi nyebut munyi tu, “Tuan Raja kelalu bisa, mua iya mirah baka sekubar” ( Mr. Anthony Richards – An Iban-English Dictionary, rambal ke-330). Charles Brooke lalu ngasuh bala sedadu iya mudik ngena kapal Zohara ngagai rumah Balang di Nanga Ngemah. Nyadi pengawa Balang ke deka begawai semina nangka udah ngepi tauka manduk beram aja.

Datai ba rumah Balang di Nanga Ngemah, bala sedadu Rajah tu tadi madahka sida diasuh Rajah ngambi Balang laban bisi aum besai deka diatur di Sarawak (Kuching). Salah mimit, Balang ke nurun ke sekali tu endang siku seorang-orang, sekayu sebatang-batang laban nadai disempulang bala menyadi tauka petunggal iya.

Nyadi maya tu kelia, ukum bunuh endang dipejalaika perintah ba Pulau Selalau, iya nya pulau siti semak pasar Sibu ke diatu. Ba Pulau Selalau tu endang bisi disediaka siti lubang alai muai bangkai orang ke diukum bunuh ketegal ti ngelaban Rajah.

Baka sida bukai mega, Balang tu tadi kena bunuh ba Pulau Selalau (Mr. Benedict Sandin – Sea Dayaks of Borneo Before White Rajah Rule, rambal ke-88). Keterubah iya Balang diukum timbak. Meda enda ulih timbak, iya lalu diukum gantung lima hari lima malam (Leonard Edwards – The Short Histories of The Lawas and Kanowit Districts, rambal 120-121). Enda ulih mati digitang, Balang lalu direndam sida. Baka nya ga, enda mih Balang ulih mati.

Nyadi ukum ke penudi sereta ukum ke pemadu berat maya nya kelia iya nya ukum gayang. Ukum gayang badu dikena di Sarawak dalam taun 1930 lalu ukum timbak badu dikena dalam taun 1946 tang ukum gantung agi dikena di menua kitai, Malaysia datai ke sehari tu.

Kenu ku jerita, orang ke dipaduka ngayang Balang iya nya Abang Talip (Mr. Stanley Ngelambong – Berita Rayat No. 120). Terubah sida ngayang Balang, iya sigi enda ulih telih. Keba ba leka renung sida ke tuai ba tibak genteran Miau Pemandang bisi nyebut munyi tu:

Ambis keris segundang luntang, papa besi sekayu nengeri Batang Rajang, peda semua ambis papa sebila pedang mata pedang. Anang digayang laban iya endang bisi ngembuan pengaruh lama, taring dua bekumbang. Kedua lulu temu antu bisi nginang. Imbai Sempandai, serayung Lulung, ibun Kumang. Endang embing Bunsu Telanjing mandi tengkeching utung rerajang. Endang orang randa betuaka aka Belang Pinggang datai ari Jangkang Kara Beringkat. Tulung Tegung Remaung Lubang ngemeranka tunjang Bukit Bangat. Temu Menyalu Bunsu Aki Lang Terebang, kindang-kindang mentachang mandi asap.”

Udah nya Balang lalu bejaku ngasuh sida muka rajut ba punggung iya. Udah rajut ambis dibuka sida, nya baru Balang ulih telih tang mih iya enda ulih mati.

Pemacha mayuh, ba senentang tu siti agi ga utai ti dipelabaka aku tau ngalitka ati kitai mayuh tu bisi nyadi iya nya siku ural tedung, siku ural kendawang enggau siku burung ketupung semampai nepan ba dada Balang laban ngidupka iya. Kenu ku tusi sida ke tuai, tujuh kali mati tujuh kali idup, enda mih Balang ulih bunuh sida laban ural tedung, ural kendawang enggau burung ketupung nya seruran ngidupka Balang belama.

Ensepi diri enda ulih bunuh sida, dia Balang empu lalu bejaku.

Merinsa amat aku digaga kita baka tu. Enti kita bengat keran deka munuh aku ke nadai penyalah tu, uji tampal kita ngena tanah kuning bubun aji (lubang aji) aku nya baru aku ulih parai tang rajut enggau duku ilang aku tu anjung kita pulai ke menua ngambika bisi nyadi pengingat bala peturun aku dudi ila. Utai bukai nadai ulih munuh aku laban udah sumpah sida apai aku ari Panggau Libau” ku iya.

Udah nya Abang Talip lalu nampal lubang aji Balang ngena tanah kuning. Nya baru Balang parai. Nyadi Balang ke mati tu tadi dalam taun 1866. Udah iya mati, pengaruh enggau duku ilang iya lalu dikirumka Rajah pulai ke menua. Meda utai tu datai di menua, nya baru orang di menua nemu Balang tu udah kena tipu.

Bisi ga siti jerita madahka bala sedadu Rajah deka nangkap Lintong ke bensumbar Mua Hari laban Lintong tu kelia selalu ngaga pengachau. Maya ke ngiga Lintong, sida lalu tetangkapka Balang.

Kenu ku Temenggung Koh nusi ke Tun Jugah, Balang ditangkap perintah lalu diukum bunuh laban seduai iya Kanyan deka nyerang bansa Kantu di Batang Empanang, Kapuas, kena pegai perintah Belanda maya nya kelia.

            Kenu ku Unggat, Balang tu dibunuh perintah laban iya ngayau ngalahka bansa Lusum (Lisum). Nyadi maya tu menya bansa Lusum endang bemunsuh enggau bansa Iban sereta empai nunduk ngagai perintah. Nya alai, semua bansa ke empai nunduk ngagai Rajah sigi nadai salah dikayau laban sida iya dikira munsuh perintah.

Baka ni kati pan jerita orang ngenang kebuah Balang tu mati digayang, tipan sejarah menua Sarawak madahka Balang tu diukum gayang ketegal ti deka munuh Resident di Sibu (Rejang) ke benama J. B. Cruickshank (Rasin). Ba kitai Iban, Balang tu kena bunuh Rajah endang ketegal ari jaku petenah ti digaga Unggat.

Kena ngenang budi Unggat ti nyelamatka Rajah Charles Brooke enggau Resident J. B. Cruickshank ari ke nyadi babi belang enggau manuk labang Balang, dia perintah Rajah Brooke kelia meri pangkat pengulu ngagai anak Unggat ke benama Keling enggau Matahari (Unggang). Pengulu Keling diiru Gerinang (Nitik) laban Gerinang nadai anak. Pengulu Keling enggau Pengulu Matahari tu kelia entara tuai-tuai Iban ke dulu matak bala pindah ke Batang Balleh maya bala Enjop benung bebunuh ngelaban Rajah di Katibas, bebalaska pemati aka iya Balang.

Jerita tuai ba penyadi bangkai Balang bisi enda sebaka tauka bisi bebida. Ketebal agi sida ke tuai semina nemu bangkai Balang dibai ke Kuching udah iya digayang di Pulau Selalau laban deka digambar nyadi ke lambang bansa Iban (model for the Iban figure). Gambar Balang ke digaga ari engkeraju (bronze) agi meruan ba Tiang Pengingat Rajah Charles Brooke (Rajah Charles Brooke Memorial) di Pengkalan Batu (Water Front) datai ke sehari tu ti dipilih nyadi ke lambang bansa Dayak/Iban (Ho Ah Chon – Kuching In Pictures 1840s – 1960s enggau Anthony Richards – An Iban-English Dictionary, rambal ke-24).

Nya alai, enti sema pemacha mayuh bisi rembus ke Pengkalan Batu (Water Front) di Kuching, nadai salah ga kita limpang enda lama enti deka meda gambar Balang Anak Kemping Padi tu enggau semak agi.

Siti jerita ke ditampung aku ari sida ke tuai madahka bangkai Balang dianjung bala menyadi iya ke Bukit Panggau Dulang di ulu Bangkit ke suah nyadi jalai iya ngemedung ke Panggau Libau sereta ngagai apai iya Sempiang Padi ke sebayan. Bangkai Balang enda ditumbakka sida tang lungun tauka sentubung iya semina dipantarka sida aja. Lebuh diabas sida lapan hari udah nya (pesan Balang ngasuh ngabas bangkai iya tujuh hari udah dianjung), dia sida nemu lungun tauka sentubung Balang udah puang lalu bangkai iya nadai dia agi. Malam nya sida bisi mimpi dipadahka Keling munyi tu, “Balang enda ulih giga kita laban iya udah diambi kami ke Panggau Libau, iya ga sigi anak kami. Nya alai, chukup tujuh kali peturun iya ngangkatka nama Balang, nya baru iya deka ada baru.”

Jerita siti agi ke ditampung aku ari Mr. Stanley Ngelambong madahka bala menyadi enggau petunggal Balang tu undur ke Kuching (pasar Sarawak) ngambi bangkai Balang kira sebulan sepengudah Balang parai digayang. Bangkai Balang nya tadi disalung sida ba Bukit Chundong di ulu Batang Katibas, iya nya entara Katibas di Sarawak enggau Tekelan di Kalimantan, Indonesia ke diatu. Umur Balang maya ke parai tu tadi baru buban nulang ikan, kira umur empat puluh lima ngagai lima puluh taun baka nya lalu apai iya Bulik enggau indai iya Pok sama agi idup maya Balang ke parai digayang tang mih nyau udah tuai sereta enda tentu dapat agi.

Udah bekau pemati Balang dalam taun 1866, menyadi iya Enjop (Ranggau) lalu nirika serang ngelaban Rajah. Dalam taun 1868, Enjop belabuh matak bala nirika kayau ngelaban Rajah ke alai iya nguta Nanga Bangkit, Katibas. Sekumbang ke ngelaban Rajah, iya bisi empat kali kena serang bala Rajah ke dikumbai orang putih “Katibas Expedition.”

Keterubah iya diserang Rajah iya nya dalam taun 1868. Kedua kali iya diserang Rajah dalam bulan Nam taun 1870. Ketiga kali Rajah nyerang iya dalam bulan Tujuh taun 1871. Ke penudi Rajah nyerang iya dalam bulan Sepuluh taun 1876. Menyadi Minggat apai Runai ke benama Enchana ke bensumbar Letan Pepulas Mas parai lebuh enggau bala Rajah ngayau Enjop ba siti ari Kayau Katibas tu kelia.

Enjop ke ngelaban Rajah tu tadi disaup bala kaban belayan iya ari Ulu Batang Ai, ari Kanyau, ari Emperan enggau ari Lebuyan. Sekumbang tu Rajah bisi nyerang bala Enjop di Ulu Ai dua kali, iya nya dalam bulan Sepuluh enggau bulan Dua Belas taun 1875 ke dikumbai orang putih “Ulu Ai Expedition.”

Udah Enjop, Embuas ke tebilang enggau perau Bung Tekam enggau Ayum ke bensumbar Rimau Badang badu bebunuh ngelaban Rajah, menua Katibas ditutup Rajah sereta enda diasuh iya endur Iban diau laban takutka sida begempung baru ngelaban Rajah begulai enggau bala Iban ari Batang Ai, ari Kanyau, ari Emperan enggau ari Lebuyan baka ke udah. Kenu ku jerita tuai, perau pengayau ke benama Bung Tekam enggi Embuas tu kelia digaga ari kayu tekam ke udah diambu Balang di Penyangkai Piang, ulu Bangkit, iya nya ari ulu Lubuk Bila Ujang dalam sungai Bangkit ke diatu. Badu bebunuh ngelaban Rajah kelia, perau Bung Tekam Embuas tu tengelam nyadi ural nabau sereta agi nguan Batang Katibas datai ke sehari tu. Kenu ku jerita, perau pengayau Bung Tekam tu deka pansut baru enti sema menua Batang Katibas bisi kachau.

Nyadi bala Iban ke empai tepantup ati bebunuh ngelaban Rajah lalu mudik ngulu Batang Rajang. Sekeda nya ke Yong, Cheremin, Bukit Batu enggau Bukit Salong di Mujong, Gaat enggau pati-pati ai ke bukai di Batang Rajang enggau Batang Balleh.

Bala ke ngelaban Rajah di Bukit Batu dibatak Merum, Ajut enggau Ayum ke bensumbar Rimau Badang; di Bukit Salong enggau Gaat dibatak Lebun enggau Kumbong Apai Bakum. Dalam taun 1881, bala Rajah bisi ngayau dua kali ke Bukit Batu diuluka Minggat Apai Runai seduai Chulo (Tarang) Apai Dungkong. Rajah mega bisi ngayau ke Yong enggau Cheremin dalam taun 1894, ke Bukit Salong dalam taun 1915, ke Gaat dua kali dalam taun 1915 enggau 1919.

Pengachau pukas di menua pegai Kapit ke diatu pengudah Rajah Vyner Brooke ngatur pengawa bebaik bebanchak babi (bepalit mata besapu mua) ke pemadu besai ke digulu lebih ari empat ribu iku tuai ari mayuh pupu raban bansa di pasar Kapit kena 16.11.1924. Ba pengerami tu mega Rajah nitah tauka nyiri Pengulu Koh nyadi Temenggung, iya nya kepala bansa kitai Iban di Sarawak.

Kenu ku jerita tuai, kebuah Balang tu enda gayu laban baka tu. Nyadi sekali iya ngemedung ke Panggau Libau. Di rantu jalai, iya betemu enggau Bungai Nuing. Ku Bungai Nuing, “Balang enti nuan ninga babi baus maya nuan niki rumah panjai di Panggau Libau negi, anang sekali-kali nuan nilik ke baruh rumah.”

Benung Balang tu niki tangga rumah panjai sida aya iya Keling di Panggau Libau, dia iya ninga babi balat amat baus di baruh rumah. Iya pan lalu nilik ke baruh rumah sereta tepedaka Indai Lipai telanjai geganjang belanda di baruh rumah.

Salah amat pengawa di tu Balang, mali baka tu anak mali mati digayang Tuan,” ku Bungai Nuing.

Kejang Balang deka pulai ari Panggau Libau, Bungai Nuing bejaku baru. Ku iya, “Balang pemulai nuan tu lagi, nuan deka mansa siti lubuk endur ai keruh betemu enggau ai chiru. Anang sekali-kali nuan mandi dia.”

Dalam rantu jalai pulai ngemedung ari Panggau Libau, Balang tetemuka lubuk endur ai keruh betemu enggau ai chiru. Sepi Balang isi iya peluh amat. Iya enda bedulika pesan Bungai Nuing sereta mandi ba entara ai keruh enggau ai chiru.

Apu Balang, mali mandi ba lubuk entara ai keruh enggau ai chiru tu anak, mali mati setengah umur,” ku Bungai Nuing.

Ketegal sumpah Bungai Nuing tu mih Balang enda gayu kenu ku jerita sida ke tuai.

Nangkan ke nya, Balang udah ensuruk Pun Buluh Berani maya iya mansang ngemedung ke Panggau Libau. Orang ke udah ensuruk Pun Buluh Berani sigi amat berani, sigi amat beberita, sigi amat tau serang tang enda gayu enti nitihka ajar Sengalang Burung dalam leka timang tauka leka pengap sida ti nyadi lemambang laban Pun Buluh Berani tu kelalu changka.

Ga dan lintang nyin udah disuruk niang Balang, nya mun ke iya mati digayang Tuan Raja,” ku Sengalang Burung dalam leka pengap Gawai Burung tauka Gawai Kenyalang Iban di Batang Saribas.

Kelimpah ari ke ditulung dikarung sida ari Panggau Libau, apai iya Kemping Padi ari Sebayan, Ribai ari tasik, apai Sali (Balang bisi baju diberi apai Sali. Baju nya diatu diibun Pengulu Jampi, siku ari peturun Balang, di Nanga Entawau, Balleh, Kapit), Balang mega ditulung Biku Iman Bunsu Raja Petara, Pantan Inan Raja Jedia enggau anak Iya ke benama Iyak Tambak Bunga Jeranga Ngembuan Geluga Dulang Penyepuh, Endu Takang Temiang Ransa Ngemataka Nyawa Seput Mayuh enggau Iyak Tambak Bunga Jerami Ke Beati Sinu Kasih, Endu Tangkung Puchung Penguji Ke Mereti Tau Ajih.

Nama Balang mayuh dipansa dalam leka sampi enggau leka timang tauka leka pengap Iban di Batang Rajang enggau Batang Saribas. Ambika banding, aba Timang Gawai Burung di Balleh, Kapit, iya nya ba genteran Berangkaika Reban, nama Balang bisi dipansa lemambang munyi tu:

Bejaku Lang Entebalang Mekang, Igat Geliga Tandang, akan Sepuntang Medang; enti kemarau enggau kitai ngerendang takang kayu tapang, kemarau Balang tau dianti, nya kemarau nyanggau panas miang, reban keru nadai meranggang, api nyadi mau ngenchembang, makai tiang balan tebelian.”

Ba genteran Ngabas Pengerangkai Reban, nama Balang bisi dipansa sida lemambang munyi tu:

Pandak Segatak seduai Nendak, bejalai ngerampai tatai nyeradak lebak, ngabas pengerangkai umai Sengalai Lang Julak, ke udah direndang kemarau Balang pandang panas Sandak. Peda kulit kayu pelepak, udah tekupak, nyau tesilak baka kain indu Kantu Sepak berumpak beribun nubai. Angkat Pungga seduai Ketupung Kiba, bejalai ngerampai tatai tanah lempa, ngabas pengerangkai umai Sengalai Lang Rimba, ke udah direndang kemarau Balang pandang panas Juna. Peda kulit kayu kedemba, udah tekupak, ambis tebuka baka kain indu Kantu Upa pansut kanda nempala ilai. Bungai Nuing Panggit seduai Ketupung Lasit, bejalai niti tatai tanah bukit, ngabas pengerangkai umai Sengalai Lang Lunyit, ke udah direndang kemarau Balang pandang panas Usit. Peda kulit kayu merekunyit, nyau tekelanit baka kain indu Ukit besila panjai.

Balang bebini jadi enggau Rawa (Kumbau) beranakka Ngelambong. Ngelambong jadi enggau Lanyun, beranakka Sindu. Sindu belaki jadi enggau Kumbong (Keting Nguyu) sereta beranakka Bakum (aki ex-Pengulu Laja di Katibas), Banta (Banta’) enggau Balu (Balu’). Banta belaki jadi enggau Ngelambai beranakka Abang (Chai tauka Belayong), Merang tauka Tuba, Patan, Mai, Latap, Kebang enggau Nili. Merang jadi enggau Mutang (Sedai) sereta beranakka Kulleh, Likong, Buda (apai Penulis) enggau Manggi.

Pemacha mayuh, udah kitai macha Gempung Jerita Tuai Bansa Iban tu kenyau ari pun nyentuk ke ujung, kami dua arapka kitai anak Iban tu udah ulih berati sereta ngasaika pengeliat, penajam, pemutus, pengeransing, pemerani enggau pengempang ati aki ini kitai kelia berantuka nyawa mubuk menua ke Sarawak kitu.

Ari nya kami dua arapka kitai sama ngembuan pengeliat, penajam, pemutus, pengeransing, pemerani enggau pengempang ati Iban kelia dikena ngemansangka diri dalam pemansang pelajar sekula laban pemansang pelajar sekula tu mih buku guna pemansang dudi ke senyata baru awakka;

Dikena kitai peturun Iban tu nganti senyata aki ini kitai kelia baka Ningkah berani mangah jampat nyanggai, apai Senapang Patah enda kuyah kena beperang. Emperaja impun Kumang Menun mulut kuntum sepemalun sempa pinang tuai, indai Seterum leka petunang.

Dikena peturun Iban nganti Jagit kaki beselumbit jampat ngagai, apai Sumpit Lasit rurus direjang. Emperaja jeling Kumang Cheraring, bengeli juring tajam begeremai, indai Juing laja dikedang.

Dikena peturun Iban nganti Salan penguan pampang jalai, apai Sangkuh Suran pala sesuam buban penerang. Perembam dalam Sempidan Panjai Langgai, indai Dajap Tajam nyapan begelemang.

Dikena peturun Iban nganti Gindau enda kala sabau mali rangkai, apai Sangkuh Bangkau pala kekitau besantuk tulang. Emperaja bungkur ke sesitur besanggul besimpul silai, indai Nyabur penganchur antu’ darah legang.

Dikena peturun Iban nganti Nyambung pabung di patung, lempung bai bejalai, apai Gagung Birung pesit belawang. Emperaja sulu Kumang Benyu lanjut tusu; sepiak pandak, sepiak panjai, indai Ketapu Linga’ Lingu ujak lelanjang.

Dikena peturun Iban nganti Bugi’ jai isi kurus ngerigai, apai Terabai Besai lantang di gelang. Emperaja biak Kumang Sinak bengeli rawak berapak jarai, indai Tukak entak di gerejak simbang jerungkang.

Dikena peturun Iban nganti Suluk tegar merejuk lansau pejalai, apai Chiruk Seligi Pinang. Emperaja perut Kumang Binjut, tusu lanjut panjai chechibai, indai Kambut Putut beperamut tali tengang.

Dikena peturun Iban nganti Selulut Ribut Ngusai, apai Kebal Tutup rerikut nangkup di ubut punjung jejumpung. Emperaja biak Dayang Sinak Kayak Tali Sentagai, indai Unsak gigi anak remaung lubang.

Dikena peturun Iban nganti Beleli tan nugal sehari-hari sampai ke lemai, apai Api Nyadi Mau Rerendang. Emperaja bidik Dayang Satik kaki emperenjik jampat ngeranjai, indai Lutik chechendik mengkang arang.

Lebuh kitai tinduk di retuk papan dibalan, bebungkur enggau langgur bali berinjan; kami dua besampika kitai bemimpi nyatu kalu rian keban, mimpi nyarau sibau mansau setandan, mimpi ngerarahka buah melanjan buban, mimpi ngeruruk tampuk ati bulan ngambi enti jai, kitai jai empili burit tajam, ngambi enti umang kitai umang kenyalang tansang meruan. Isa jai kitai jai empili juring puting, isa umang kitai umang kenyalang tangkung kekaling.

            Dalam dunya tu, kitai peturun Iban amat baka garam enda bulih segenggam, amat baka berau enda bulih sechapan, amat baka paku enda bulih se-emperan tang di Sarawak ditu, kitai beberita mayuh ari beluh nyaru arang, beberita banyak ari lemetak di Tinting Kedang tang mayuh peturun Iban enda nemu kenyalang tebilang ketegal tangkung, bukit beberita ketegal remaung, Iban dipebasaka enti begempung.

            Mayuh anak Iban enda nemu Kempat Tiang tebilang laban langgai, Sarawak tampak ketegal sungai, Iban kering enti begulai sejalai.

Mayuh anak Iban enda nemu Kelingkang tebilang ketegal tinting, Panggau Libau beberita ketegal Keling, Iban bekuasa enti sama penemu saum runding.

Mayuh anak Iban enda nemu Batang Lupar tebangkar ketegal Bujang Senang, rita Gelung begemung laban Kumang, Iban kering enti sama kuing saum singkang.


WhatsApp chat